Sungkai @ Collex-Bossy

Nostalgia aie mulanya: Makan Tahun & Kulat Tahun.

Anglah, bahawu tah ku masaie lagi makan masakan uang Bounai. Nyaman hantap panya.... mlm kalamaie kami sugkai di umah C 10a jaan kaluaganya di Collex-Bossy. Makacih Dato & Datin, jaan jaa, aie lain lagi...

Klu ku ingat2 mlm atu sadih jua asanya, mcm anak dagang, dapat jua numpang makan aah Dato & Datin. Dui malaiku, kasiannya... Takanang tah ku jua pasal makan2 di kampung aie mulanya... Saingat2ku mulanya di kampung kami diadakan makan sakampung satahun sakali lapas ngatam padi dinamai Makan Tahun. Kaang ani inda lagi ada, uang patuhaan pun inda lagi bapadi sababnya tampat pemadian basia biani panuh sudah ulih umah.

Makan Tahun atu mimang basaa2an, samuha uang kampung basaa damit dilagau. Bila ada dangan malagau makan2 biasanya ucapannya mcm ani: “Ooo tangahnya… bapa manyuuh ka umah esok, samuha (bilang uang) disuuhnya ka umah, makan2 doa salamat”. Biasanya ada tia yg njawab “Aau… abis kami saumah tu ka sana, ucing pun tuut”. Bila yg njamput atu pandai, dijawabnya mcm ani: “Palui banaa tangah nie… ucing tu inda payah dibawa, bukannya jalama tu, jalama nganya bapa suuh lagau. Mbah mulih taku… jaan inda ka umah”.

Aie makan2 atu uang patuhaan sibuk bausah. Bausah ani bukannya aie makan2 atu nganya, tapi sakuang2nya sahaie sabalum makan2 uang patuhaan sibuk taya mahunja kayu api, daun nyiik, mbasuh kawah, minjam pingan mangkuk, mcm2 taya ada yg babuu mahunjaa kaabau. Biasanya mlm atu mahuaa dadih taya kan mbuat kalupis & wajit. Uang pabinian biasanya bausah di dapoo ngupas bawang, mahaap bawang, ngupas hubi gantang, nyusun daun nyiik, & mcm2 taya. Uang palakian sibuk mbuat taatak, mbasuh kawah, ngukoo piasau, mahaap daging, & mcm2 taya. Aie makan2 ani tah uja dangan paluang basaa uang pamudaan untuk mancahaie pasangan masing2. Di kampung kami mulanya inda bibas, uang pamudaan (laki2 & bini2) jaang bajumpa, tahu2 tadangaa habaa ada tia yg batunang atau kawin. Inda diee tahu bila basia bacinta uja dangan.

Babalik ka caita bausah antaie. Biasanya bausah dibuat aie sambat, sabab kan nyampati akan makan tangah haie. Masak nasi, masak daging atau hayam, masak gulaian biasanya humbut piasau (paling sanang). Yg sabanaanya humbut piasau ani saingat2ku bilang kali makan2 misti ada. Asanya pun nyaman, tambahan lagi mun disapaki lauk masin.... eeh baik hantap asanya e2.

Uang tuha mulanya bila basia malagau makan2 inda ia bapadah jaamnya, biasanya “tangah haie” nganya uja basia. Lagi pun uang mulanya, inda bilang buah umah ada jaam. Aku aie damit mulanya, malihat jaam pun inda pandai, di umah pun kami inda bajaam. Sudah sikolah bahaau tah tahu malihat jaam, atu pun kala2 salah jua. Tapi takuin kan bilang buah umah ada. Mun paanak kaang ani ada yg inda tahu haati takuin? Uja uang kaang ani “kalindaa atau haie bulan”. Mcm mana ia dilagau takuin atu inda ku tahu. kamungkinan takuin atu datangnya daie bahasa Aab iaitu Taqwim. Oleh sabab uang Kedayan ani lidahnya kaau dikit, payah kan nyabut Taqwim atu jadi tia takuin. Inda jua ku baapa tahu, uja dangan nganya.

Selesai saja acaa Makan Tahun ani, samuha tatamu yg datang salapas siap makan & sabalum basia mulih ka umah/kampung masing2 akan dibakalkan buah tangan iaitu sakudi kalupis sabagai tanda taima kasih. Manuut cauta uang tuha2 mulanya ani adalah sabagai pangalas paut air kan mulih atu. Kaana satu katika dahulu kampung2 Kedayan ani bahalian & ada pajalanan mangambil masa sahaie suntuk.

Babalik caita kami di mlm kalamaie, ada tia yg manyabut pasal Kulat Tahun. Ia dinamai sadamikian kaana ia tumbuh satahun sakali di musim dingin satiap tahun. Ada jua di antaa kami atu yg alum masaie makan kulat ani, usulnya pun ia inda tahu. Siapa tu aah?... Uja uang tuha mulanya Kulat Tahun ani kulat kagamaan uang daat. Kulat ani jua kana galaa Aja Kulat. Sabab apa? sababnya kulat ani timbulnya ukan bilang haie, satahun sakali bahawu tia ada, Sabab luan jaang dimakan atu tah mangkali asanya luan hantap nyaman, asanya numboo wahid, manis2 di lidah sampai ka alak2 inda ada bandingannya (kalah lagi Kulat Tambibee atau Kulat Dadap). Tambah lagi disapaki udang hidup daie Jaudong, nyaman hantap e2…. Klu cuba skali, mau jua bakali2, inda nampak daun talinga nih klu makan (kacuali bacaamin). Ulih sabab kulat ani digamaaie ulih uang amai, haaganya pun mahal. Pada masa ani, indaku baapa tahu, tapi mun aie buhani haaganya 10 inggit Bounai sabungkus (kuang labih 10 puput isi di dalamnya). Atupun payah kan baluih mambali di tamu2 sababnya uang amai baabut2 mambali.

Uja aie mulah nini, Kulat Tahun ani tumbuh salapas dantuman patiee, baguuh bakilat & hujan labat & akan tumbuh di tampat yg sama satiap kali. Hayatnya inda lama, mun lambat dijumpai di sabalah patang, jaan haap kulat atu bisai upanya… buuk hantap & bakulat jadinya. Uja aie mulah nini lagi, sanang saja mahunjaa Kulat Tahun ani, tuuti saja aah tuju angin, banyak luih tu.

Siapa yg inda sampat makan Kulat Tahun tahun ani, tunggu tah tahun hadapan. Sababnya kulat ani alum ada ku tadangaa yg batanam. Klu ada biginya bajual di kadai, laku hantap pakah e2…. Iatah aie mulah nini ada mambaie patua, ujanya kalau kan mau Kulat Tahun ani batumbuh, slapas mambasuh kulat atu buang ayingnya ke atas tanah, aie lain tahun dapan tulus tia, ada tu tumbuh di sana. Sabanaanya aku sandiee paanah babuat mcm ani… banaa e2 success.

Mlm Kalamaie ada jua Dato bacaita, banaa tu, uja aie mulah nini jua janya pantang kulat ani klu mamutik jaan disungkit dgn pisau atau pamaang atau apa saja banda panyungkit, pasti inda lagi batumbuh tahun hadapan. Klu inda pacaya cuba tia….

Mbah sudah eh malaat2 nie, sangal ku sudah, kan baanti ku dahulu...