Naindah Melayu Kedayan

Nota: Penulis blog ini tidak sekali2 betujuan untuk membangga diee, bemagah2, sombong, iak atau takaboo di atas ketuunan & selasilah keluaganya. Tulisan ini hanyalah untuk bacaan umum supaya ceita2 salah satu bangsa kitani iaitu Bangsa Kedayan sepaati ani dapat didokumenkan & tidak hilang ditelan jaman. Minta ampun jua yg dipohon sekianya ada di antaa isi kandungan tulisan ani yg menyinggung peasaan paa pembaca.

Tujuan utama kediaku membuat tulisan ani banaanya kan ujukanku ganya, kan dikenang2 aie kendila, kan dibaca2 uja dangan. Tahu tah kediaku ani Uang Kedayan, bapa Kedayan mama Kedayan jadinya aku ani anak Kedayan, tapi nganya inda ada banyak ku tahu neindah Kedayan ani (tahu tah nya dangan paanak bahawu). Kadang2 ada uang betanya pasal Kedayan ani, tepaksa ku baie tahu inda ku tahu, uang tuha2 nganya tahu. Sebab atu tah kediaku cuba menulis dikit2…. Tambahan lagi klu uang tuha2 Kedayan kitani inda lagi ada, aah siapa tah lagi kan betanya? kan behunjaa?. Basia paanak bahawu kaang ani mana basia tahu tu. Tapi mun abiskita inda tepakai kan tulisan ku ani jaan pulang maah. Mun kan menambah klu ada yg kuang, bulih membaie 'komen' pakai alamat e-mail ku ani: hj.jumat@bluewin.ch

Mbah bila inda kamu baapa gagau, membaca tah, jaan tah hawaa2. Ganya inda ku banyak beluih catatan pasal Kedayan ani. Inda banyak buku/catatan pasal Kedayan ani bah, kapus2, ngalih sudah ku bekakas baang aah samak, aah baucat, aah opis, baang lacih, baang pisuk umah, inda jua banyak kejumpahan. Klu ada, aah lubang cacing pebaik kan ku cuba masuki, mun muat bah tu. Ada jua ulihku betanya2 daie uang amai, ulihku memutik2 daie tulisan dangan pun ada. Lalai2 ku bekakas inda ada ku pulang ada masa kan mang'update' blog ani. Jadinya ku biaakan saja.

Kisahnya miani…. Siuk jua musim posa di naagi sejuk nie, balik kaaja pukul 3 ptg, tapi nunggu sungkai ada lagi 6 jam. Luan inda ada kan dibuat atu, daie inda peidah2 iatah ada idea kan membuat tulisan ani. Tebaca tah ku jua satu atikal betajuk KK5. Ngancam banaa artikal atu eh, selajoo tepunduk ku membaca.... Syabas, atu ia semangat anak Kedayan tulin. Inda ada kan disupankan kitani Uang Kedayan. Uang Kedayan anie pun mcm uang lain jua, lain tah halnya klu kitani betanduk, mangkali dangan takut.

Mengikut sejaah: Asal usul Uang Kedayan di Bounai meupakan bangsa campuan Uang Jawa & Melayu Bounai yg mana peistewa Sultan Bounai ke 5 iaitu Sultan Bolkiah (1473-1521) yg ajin singgah di tanah nusantaa sepaati di Kepulauan Jawa, Sumatera, Kelimantan & temasuklah Filipina. Di Jawa Baginda dapat melihat aktiviti Uang Jawa yg ajin becucuk tanam & bepadi. Basia ani dikenali jaan uang jadi betanam (hasil tangan basia yg banyak membuahkan hasil), sudah atu Baginda salajoo menawaakan basia ani untuk menatap di Bounai. Satelah di Bounai banyak aktiviti petanian dibuat dgn giat & banyak hasilnya bahawu tah Baginda membaie hadiah. Disini tah mulanya ikatan petalian & pesaudaan Uang Jawa melalui kawin campoo dgn Uang Melayu Bounai sehingga masa ani Uang Kedayan banyak menatap di Tembuong, Tutong, Belahit & Bounai Muhaa. Ada jua yg bajaoo & menatap di Sabah & Saawak.

Manuut Syair Awang Semaun, Uang Kedayan ani bangsa yg kedua tebasaa & sudah lama betapak di naagi ani. Tapi alum ada bukti yg dijumpai untuk meyakinkan pendapat ani. Menuut Awg Bantong Antaran,Pengarah Musium2 Brunei (Puak Kedayan & Masalah Terminologinya 1985), bepandapat asal nama Kedayan atu sudah wujud besama2 dgn kewujudan Kesultanan Bounai. Aie mulanya, semuha penduduk Bounai hanya lebih dikenali sebagai ‘Melayu’ & inda ada suku kaum yg dipanggil atau dikenali sebagai Kedayan ketika sebelum wujudnya Kesultanan Bounai. Disebabkan aah tempat tinggal yg dipunyai ulih dua kelompok yg belainan, ada yg tinggal di kuala/tepi sungai bekaaja jadi nelayan. Kelompok yg satu lagi tinggal di pendalaman & kaajanya bekabun & bepadi. Basia ani suka bepindah2 & akan cuba mehunjaa tanah suboo bagi penempatan bahawu untuk bekabun atau bepadi. Ani dapat dibuktikan & dapat dilihat daie Report on Brunei (1904), menyebutkan “... the Kedayans are by nature a wandering tribe, who make no long stay in any place...”

Mengenai Bahasa Kedayan jaan Bahasa Melayu Bounai, menuut Awg Mangantar Simanjuntak, bepandapat dialek Kedayan ani adalah salah satu subdialek kpd Bahasa Melayu Bounai di samping subdialek Kampong Aying & subdialek BSB. Waktu pemisah dialek Kampong Aying dgn dialek Kedayan adalah dlm jangka masa 100 ke 200 th yg lalu. Dgn demikian, dapat diandaikan yg dialek Kedayan & dialek Kampong Aying atu adalah asalnya daie satu dialek. Ani behaati petutuan kedua2 dialek ani adalah beasal daie satu tempat yg sama. Ulih sebab satu kelompok pindah ke daat, lama kelamaan menjadi tah dua dialek yg belainan iaitu dialek Kampong Aying (dialek Melayu Bounai) & dialek Melayu Kedayan. Tapi pendapat ani masih lagi dlm samaa2 untuk membuktikan asal usul Uang Kedayan. Tapi apa yg pasti Bangsa Kedayan ani ialah salah satu penduduk jati NBD yg becakap Melayu Kedayan. Kitani sudah maklum bahasa yg digunakan ulih Uang Kedayan ani bunyinya mcm kasaa tapi sebanaanya caa kuapak Uang Kedayan ani adalah lembut bealun & penuh makna. Uja P. Ramlee aie mulanya "bahasa menunjukkan bangsa."

Ada uang bepandapat, ayi mulanya di Naagi Bounai ani hidup haliwat hantap, sebabnya makanan payah kan dihunjaa. Uang Bounai aie mulanya kebanyakannya hidup di aying, sebabnya basia ani pelaut. Inda basia mau hidup di daat, sebabnya uja uang tuha2 mulanya basia ani takut kana punggal kepala ulih pengait. Jadi sudah demiatu, behunjaa jalama tah Aja Bounai yg mau kianya hidup di daat, bekabun padi, buah2an beindah. Mengkali jua Aja jaman atu bepadian jaan Aja Kutai (subalah Kelimantan). Bedudun tah Aja, selajoo behunjaa jalama yg sanggup tuut mulih ke Bounai untuk disuuh bekabun. Teluus jua ada yg sanggup tuut (mengkali digaatak ulih Aja Kutai, atau dibaakannya hambanya aah Aja Bounai). Deminya datang ke Bounai, salajoo kana baie tanah untuk bekabun. Tempat atu ahie2nya begalaa Sungai Kedayan (kakal ada itu kaang ani). Jadi sudah bekabun, ada asil, Uang Bounai yg andang2 ada di Bounai, bepahalu tia jaan uang yg bekabun ani. Bepahalu ani haatinya, betukaa2 naindah (barter trade uja Uang Putih). Yg bekabun ada baas, pisang, batat, hantimun, gandum dll. Yg pelaut mbawa lauk. Tempat pehaluan yg tekanal masa atu ialah di Baakas di hulu Sungai Kedayan, di Telanai & Kilanas. Sudah batah atu, mun sudah amai yg bepahalu ani, Aja pun tedangaa. Tuun tah Baginda bacamaa Duli melihat dangan bepahalu ani. "Bekadai2an bisiedia ani" ujanya. Haatinya bekadai2an ani, bejual2an tapi inda dlm kedai, aah lapang tah pulang tu. Makin batah, makin malaa dangan bekedai2an, kana galaa tia jalama damiani uang bekedai2an. Mun sudah batah atu beubah tia menjadi Uang Kedaian. Hujung2nya tinggal nganya Kedaian. Jadi jalama yg kana bawa ulih Aja daie subalah Kelimantan ani kana galaa Kedaian (Kedayan) sampai kaang ani. Teori ani inda mudah kan ditentukan banaa kah inda?, inda ku tahu.

Ada jua uang bependapat, yg seingat2nya ada yg becaita Uang Kedayan ani asalnya daie Jawa. Basia ani bagas hantap bekabun, bukan bekabun saja tapi banyak pemandainya. Memukat bulih jua, menjaat bulih jua; dibuntakan caita basia ani saaba saabi pandai. Salain daie tahan belalah, basia ani jua pandai menchaie. Mun nganya seminggu basia ani ditinggalkan di hutan alum basia mati kelapaan.

Uja uang tuha2 mulanya lagi, Uang Kedayan ani bukanya calang2 uang, kan semuha basia ani beilmu. Basia ani mun uang mbuat baik basiakan baik jua tapi mun kana jahati, bah inda payah diajaa ni munkan bejahat. Basia2 yg hebat ilmunya atu bila ditanya inda basia mengakun beilmu tapi nesihat basia pelajaie asal usul ajiki, asal usul aying, tanah, api, basi & lain2 yg basia gunakan untuk membangkit. Basia ani pandai memindah angin & hujan. Nasi bajaang pun inda masak tu bila basia bacaie. Mcm2 ilmu basia tedapat, ada yg pandai memantak, menguis, menangkal, mugai, antah apa lagi... Inda jua ku menyangkal aie mulah datuku namanya Diah, uja bapa uang pemantak tu…. Aku ani tadangaa caita jua nganya, sama ada banaa atau inda, inda tah ku tahu. Pugai pun ada ku tedangaa. Sakuat2 pugai, caita uang petuhaan mulanya ialah bila basia dapat mugai batu pengilingan lada benanang atas aying. Sandi tu pugai Kedayan…. Bilakan dikia2, batu pengilingan lada atu baat, apa jua ulahnya benanang kian?. Mun batu pengilingan lada dapat benanang atas aying, apa lagi jelama. Ani kan caita jua nganya, inda ku tahu ilmu pugai tu. Satu lagi pasal luka & daah memang pandai basia mantan. Mantan luka ani bukannya senang,ingat2 ku, aie diee damit mulanya, masaie ku luka tecucuk maang di tundun aie bejaoo di Bukit Tempayan Pisang, dipantan ulih uang Kampong Serasa, namanya ingatku lagi, Si Punggut. Sekali ia mantan taus baanti daah keluaa.

Uang petuhaan Kedayan ani aie mulanya, tebiatnya ingin mencuba, maksudnya bukan mencuba kasut atau mencuba baju tapi mencuba ilmu. Bilakan melihat ilmu Kedayan, aie makan2 tiya banyak keluaa. Basia ani duduk nganya ia, becaita pasal ilmu. Misai uang tuha2 Kedayan mulanya biasanya melantik, Misai lantik atu sebanaanya menjadi tanda (trademark) Uang Kedayan yg ia atu baani & beilmu. Yg ku tahu uang petuhaan Kedayan aie mulanya yg beilmu ani banyak pantangnya. Mcm aie mulah nini sebuting nganya pantangnya, bila ada kanak2 damit jaan tia disuuh tahani, tatap damam mun ditahaninya, mcm uang ketaguan. Kekal ku tekanang aie mulanya, dlm th 60an kanak2 damit ditahani ulih aie mulah nini, inda batah taus damam. Lepas atu dibaienya aying, suuhnya tepuskan, inda batah baik taya.

Nota: Kediaku ada tedangaa bahawa sebahagian daie ilmu Uang Kedayan aie mulanya ani tepisung daie akidah kitani sebagai umat Islam, teutama sekali yg menggunakan mentaa. Tapi ada jua yg menggunakan ayat2 suci Al-Quran & balandaskan sepanuhnya kpd tatacaa & peadaban Islam, teutamanya di bidang peubatan tedisional. Aku pecaya paa pembaca akan dapat menilai hakikat yg sebanaanya. Tulisan ani hanyalah untuk menginggatkan sejaah Uang Kedayan di masa lampau. Uang tuha2 aie mulanya yg disabut dlm caita ani pun inda ada lagi, bilang uang sudah meninggal. Ini caita dahulu kala bah. Sama2 kitani hadiahkan Al-Fatihan kpd roh2 basia, mudah2an diampuni dosa basia & dicucuie aahmat. Aamin.

Ada juaku tedangaa aie buhani, ada pihak yg yakin selepas pemaintahan Sultan Bolkiah, Uang Kedayan ani ada sudah bekampong di hulu Sungai Kedayan namanya Kampong Melabau. Ani adalah bedasaakan kpd caita2 Uang Kedayan yg beketuunan daie Kampong Melabau. Di masa yg sama basaa kemungkinan ada jua kampong2 Kedayan yg lain di sepanjang Sungai Bounai pada masa atu.

Ada jua ku tebaca, bahawu2 ani wujud pendapat yg mengatakan tanah asal Uang Kedayan ani ialah Kutai Karta Negara di subalah Kelimantan Tengah. Ini bedasaakan kpd penamuan2 bahawu yg mendapati Bahasa Kedayan jaan Bahasa Kutai hampie sama. Daie atu kana dapati nama Kedayan atu beasal daie kata Kutaian (Uang Kutai). Tambahan lagi mitos Lela Menchanai hampie sama dgn mitos Keajaan Kutai iaitu Kisah Puteri Tanjung Buih.

Haie atu ada jua ku betanya aah C 10a, mcm sama saja caitanya, ada ia membaie tahu, tapi inda ku baapa ingat... uja bapanya Uang Kedayan ani asalnya campuan Uang Majapahit jaan Uang Kina yg sama2 tinggal di tebing2 Sungai Bounai, lama2 naik ke daat. (Atu pakah yg di baie tahu ulih C 10a ????... Indaku tekinta bah).

Ada jua aku memukul talipaun ke Bounai, batanyakan pendapat daie seuang kawanku Ahli Kaji Uang Mulanya (Kaji Purba). Ujanya banaa hantap tu Uang Kedayan ani andangnya dibawa masuk ka Bounai klu mengikut caita awalnya. Mengapa ia dibawa masuk? pasalnya, basia ani tah jelama atau bangsa yg bagas hantap bekabun, manchaie kan dimakan diminum utk anak bininya. Mun ada lebih ajiki basia jual. Ani inda behaati bangsa lain atu inda bagas tapi maksudnya masa atu Bangsa Kedayan ani tah yg paling bagas ujanya.

Ada jua yg membaie tahu, sejauh apa yg dipahaminya Uang Kedayan ani beasal daie Pulau Jawa. Semasa Aja Bounai melawat ke Majapahit, (batah pulang sudah tu). Aja Bounai dihadiahkan dgn satu kapal penuh dgn Uang Jawa ulih Aja Majapahit. Basia ani banaanya uang yg pandai bekabun & bepadi, pasal Uang Bounai pandainya menangkap lauk (mancahaie makan di laut & sungai). Basia beumah di tebing2 sungai & di daat inda pulang banyak mangkali masa atu aah. Sipun tia kaang ani pun kakal jua inda banyak Uang Bounai yg ajin bepadi. Kedayan pebaik inda jua lagi banyak yg bepadi. Pasal basia tuha2 sudah & tempat pemadian basia biani penuh sudah ulih umah.

Banaanya Uang Kedayan tah yg memenuhi kepaluan ekonomi Bounai masa atu untuk becukuk tanam. Sebelum th 50an di Bounai ani kampong2 di Baakas, Jalan Muhaa, Gadong, Hulu Sungai Bounai, Jaudong & Jln Tutong sampai ka Batu 21 dijalamaie ulih Uang Kedayan. Selepas th 50an bahawu tah Uang Bounai mulaie pindah ke daat pasal ada sudah kaaja lain selain daie jadi nelayan. Nya uang tuha2 mulanya kaaja paintah atau kaaja gamen.

Basia ani upanya daie asal mulanya sudah banyak jua yg inda mahu kan tahan2 di Bounai. Banyak jua yg pajaoo sampai ke bilang pisuk, sampai keluaa sempadan ke Sabah & Saawak, maklum saja biani inda ada besampadan. Tapi ka mana jauh pun basia maantau cakap petutuan basia masih sama. Apa yg sayangnya, banyak hantap sudah basia ani yg kawin sama puak lain, iatah kadang2 ada yg inda paham kan kuapak Kedayan ani. Mun bejumpa aah kawin2an mun uang tuha2nya betatuan Kedayan basia yg muda2 ani inda baapa tahaati cakap atu.

Yg banaanya alum ada yg tahu mcm mana nama Kedayan atu wujud. Yg dangan tahu ada bangsa namanya Kedayan. Malangnya aie mulanya atu alum ada pusat pemaintahan yg lengkap dgn tukang tulis. Yg ada tukang tulis aie mulanya atu ialah naagi2 yg lebih jauh temadunnya mcm Naagi China, Potugis & Sepanyol. Tapi basia ani pun inda ada menulis pasal Uang Kedayan.

Tapi bahawu2 ani ada ku tebaca yg nama Kedayan atu dipecayai beasal daie pekataan Jawa atau Melayu Lama, "Kadang Kedayan". Kadang dlm dialek Jawa haatinya paadian atau keabat Aja, & Kedayan haatinya pengikut (retainer). Dlm haati lain Kedayan haatinya uang pendalaman atau uang daat.

Kamu2 minta limut ku dehulu aah. Banyak sudah maklumat bahawu yg alum jelas aah ku. Ada lagi kaaja lain kan ku buat. Minta maaf ah. Kamu yg lain mun ada maklumat bahawu baik tah kongsikan sama, sipun tia inda bisai bunyinya. Mana tahu caita ani dapat diusai aie kendila. Tapi mun ada maklumat bahawu jaan tah watiee mau ku bkongsi nie, sipun tia pahit asanya kan ditelan jua, mun ukan Uang Kedayan yg mahunjaa siapa lagi. Nya dangan mun indung atu sipun tia jahat upanya kekal jua indung diee. Mun kitani lupakan jauh hati basia kaang.

InsyaAllah, bila dipanjangkan umoo aie kendila kediku akan sambung tulisan ani lagi. Ani bukan ujaku tapi uja uang tuha2 mulanya. Mbah bainut tahku….